Хятадын эдийн засгийн ирээдүй тодорхойгүй байна гэх болгоомжлол газар авахын хэрээр тус улсын чинээлэг иргэд хилийн чанад руу их хэмжээний мөнгө гаргаж алт болон Японд үл хөдлөх хөрөнгө худалдаж авч байна хэмээн New York Times сонин мэдээлэв.
Тус мэдээнд дурдсанаар Хятадын иргэд болон хувийн хэвшлийн компаниуд нэг сарын дотор 50 тэрбум ам.долларыг гадны орнууд руу гаргаж байна гэх тооцоог хийжээ. Тэд уг мөнгөөрөө Токио хот орчимд орон сууц худалдаж авах эсвэл харьцангуй өндөр хүүтэй Америк, Европын банкны данс руу шилжүүлж байгаа болохыг онцолсон байна.
Түүнчлэн эдгээр хүмүүс эрх баригчдын хяналтаас зайлсхийхийн тулд хилээр нэвтрэхдээ мөнгөө бага оврын алтан гулдмай юм уу эсвэл гадаад валют болгон тээшиндээ нуух зэрэг арга хэрэглэж байгааг тус мэдээнд цохон тэмдэглэжээ.
Эх сурвалж: YTN