Nihon Keizai Shimbun (Nikkei) сонины 26-ны өдөр мэдээлснээр, Mitsubishi Electric компани Японд батлан хамгаалахын тоног төхөөрөмж үйлдвэрлэх гурван шинэ үйлдвэр байгуулахаар болсон талаар онцолжээ. Японы засгийн газар батлан хамгаалахын төсвөө нэмэгдүүлж байгаа энэ үед тус компанийн энэхүү шийдвэр нь радарын систем зэрэг батлан хамгаалахын тоног төхөөрөмжийн үйлдвэрлэлийн хүчин чадлаа бэхжүүлж буй явдал хэмээн тайлбарлаж болох юм.
Тус мэдээнд дурдсанаар Mitsubishi Electric компани гурван шинэ үйлдвэр барихад 220 тэрбум иенийн хөрөнгө оруулалт хийхээр төлөвлөж буй аж.
Түүнчлэн компанийн зүгээс гурван үйлдвэрийн нийт найман барилга байгууламжийг 2025 оны дөрөвдүгээр сараас эхлэн ээлж дараалан барьж дуусгах гэнэ. Тухайлбал Канагава мужийн Камакура хот дахь үйлдвэрт 3 байгууламж, Фукушима мужийн Корияма хот дахь үйлдвэрт 4 байгууламж, Хёго мужийн Амагасаки хотод Цахим холбооны системийн үйлдвэрийн 1 байгууламжийг тус тус бүтээн байгуулах төлөвлөгөөг гаргаад байгаа юм.
Mitsubishi Electric компани нь Батлан хамгаалах яамны захиалгаар радарын систем зэрэг хамгаалалтын тоног төхөөрөмжийг үйлдвэрлээд багагүй хугацааг өнгөрүүлж байгаа билээ. Үүнтэй холбогдуулан ирэх оны тавдугаар сард сансрын батлан хамгаалахын салбарын инженер техникчдийг сургах, солилцох зэргээр ажиллах хүчээ 1000 хүртэл тоогоор нэмэгдүүлэхээр төлөвлөж байгаа аж.
Зөвхөн Камакура хот дахь үйлдвэрийн шинэчлэл болон шинэ байгууламжийн бүтээн байгуулалтын зардалд ойролцоогоор 70 тэрбум иен зарцуулахаар төлөвлөж буйгаа тус компани өмнө нь зарлаж байв.
Сонирхуулж хэлэхэд Mitsubishi Electric компани нь батлан хамгаалах салбарт гадаадын засгийн газартай шууд гэрээ байгуулсан Японы анхны компани болоод байгаа билээ. Тодруулбал Австралийн Батлан хамгаалах яамтай өнгөрөгч 19-ний өдөр батлан хамгаалахын техник хэрэгслийг хамтран боловсруулах гэрээнд гарын үсэг зурсан юм.
Эх сурвалж: Fnnews