Лхагва гарагт “Ювентус” клуб 1:0 харьцаагаар “Аталанта”-г буулган авснаар Италийн цомын төлөөх тэмцээнд 15 дахь удаагаа түрүүллээ.

“Ювентус”-ын довтлогч Душан Влаховичийн тоглолтын дөрөв дэх минутад оруулсан гоол дасгалжуулагч Массимилиано Аллегригийн багт гурван жилийн дараа Италийн цомыг дахин өргөжээ.

Тус тэмцээний финалд хамгийн олон удаа тоглож /22/ хожсон ювентусчууд хамгийн сүүлд 2020/2021 оны улиралд түрүүлснээсээ хойш аваргын цомыг өргөөгүй байсан ба тухайн үед финалын тоглолтод мөн "Аталанта"-г хожиж байсан юм.

Италийн дасгалжуулагч М.Аллегригийн хувьд Италийн цомын тэмцээнд багаа таван удаа ялалтад хүргэсэн анхны дасгалжуулагч боллоо. Өмнө нь тэрбээр дөрвөн цом хүртсэн Свен-Горан Эриксон, Роберто Манчини нартэй эн зэрэгцэж байлаа.

Харин 2022 оны финалд “Интер Милан”-д 4:2 харьцаагаар хожигдох үеэр гоол оруулж байсан Сербийн хөлбөмбөгч Д.Влахович нь Италийн цомын хоёр финалд гоол оруулсан “Ювентус”-ын гурав дахь тоглогч болсон бөгөөд Жон Чарльз /1958-59, 1959-60/, Савино Беллини /1937-38, 1941-42/ нар урьд нь ийм амжилт үзүүлжээ.

Италийн цомын төлөөх 1962-63 оны тэмцээнд цорын ганц удаа түрүүлж байсан “Аталанта” баг энэ удаад тус тэмцээний финалд зургаа дахь удаагаа шалгарлаа. Ирэх лхагва гарагт Европын лигийн цомын финалд “Байер Леверкузен”-тэй тоглох аталантачууд түүхэндээ анх удаагаа нэг улиралд хоёр өөр тэмцээний финалд шалгарсан байна.

Эх сурвалж: The Reuters /МОНЦАМЭ агентлаг/