Мягмар гарагт олон улсын криптовалютын зах зээлд биткоины ханш өсөж, нэгж биткоины үнэлгээ сүүлийн хоёр гаруй жилийн хугацаанд анх удаагаа 56,000 ам.долларыг давжээ. Улмаар мягмар гарагийн 12:30 минутын байдлаар нэгж биткоины үнэлгээ 55,934.68 ам.доллар байна.

Биткоины ханшийн хувьд хамгийн сүүлд 2021 оны арванхоёрдугаар сарын нэгэнд 56,000 ам.долларын үнэлгээтэй байсан ч түүнээс хойш тасралтгүй унасан юм. Харин мягмар гарагт тус валютын үнэлгээ хамгийн ихдээ 56,661.27 ам.долларт хүрчээ.

Тийнхүү биткоины ханш өсөхөд уг коины ханшийг даган хэлбэлздэг бусад коины ханш ч өссөн байна. Тодруулбал, нэгж эфериумын ханш л гэхэд сүүлийн 24 цагийн хугацаанд 3.73 орчим хувиар өсөж, Улаанбаатарын цагаар 12:30 минутад 3,220.67 ам.долларт хэлбэлзэж байв.

Улмаар зах зээлийн шинжээчдийн таамаглаж байгаагаар энэ маягаар биткоины ханш өссөөр ойрын нэг жилийн хугацаанд нэгжийн үнэ 75,000 ам.долларт хүрэх юм.

Эх сурвалж: CoinMarketCap