Киргиз улсын нийслэлд төрийн шинэ далбааг мандуулах ёслолын ажиллагаа боллоо. Энэ тухай тус улсын засгийн газрын хэвлэлийн алба өнөөдөр мэдээлсэн байна.

Сайд нарын танхимын дарга, Ерөнхийлөгчийн Тамгын газрын дарга Акылбек Жапаров нийслэлийн “Ала-Тоо” төв талбайд Киргиз улсын төрийн далбааг мандуулах ёслолын ажиллагаанд оролцжээ. Мөн парламентын дарга Нурланбек Шакиев, Төрийн нарийн бичгийн дарга Суюнбек Касмамбетов, Онцгой байдлын сайд Бообек Ажикеев, Жанжин штабын дарга, Батлан ​​хамгаалахын нэгдүгээр орлогч сайд Руслан Мукамбетов нар энэ ёслолд оролцсон байна.

Киргиз улсын төрийн далбаан дээрх нарны цацрагийн долгионтуулсан хэлбэрийг шулуун болгож хэсэгчлэн өөрчлөлт оруулах тухай Засгийн газрын боловсруулсан хуулийн төслийг парламент дэмжсэнээр уг хууль 2023 оны 12 дугаар сарын 26-нд албан ёсоор хүчин төгөлдөр болсон юм.

Хуучин төрийн далбаанд улаан өнгийн тэгш өнцөгт хэлбэртэй дэвсгэрийн голд киргиз гэрийг дээрээс нь дүрслэн байрлуулж, гадуур нь нарны 40 цацрагийг долгионтуулж зурсан байсан бол харин одоо нарны цацрагийг шулуун болгон өөрчилжээ.

Киргизийн төрийн далбааны өмнөх хувилбарыг 1992 оны гуравдугаар сард тус улсын парламент баталснаас хойш өөрчлөөгүй юм.

Эх сурвалж: ТАСС /МОНЦАМЭ агентлаг/