Мьянмарын цэргийн дэглэм 2021 оны хоёрдугаар сарын нэгэнд тус улсын засгийн эрхийг авснаас хойш анх удаагаа цалин хөлсний хүрээнд томоохон шинэчлэлийг хийжээ.
Тодруулбал, Мьянмарын цэргийн дэглэмийн зүгээс хөдөлмөрийн хөлсний доод хэмжээг 20 гаруй хувиар нэмэгдүүлэх шийдвэр гаргасан бөгөөд энэ нь Мьянмар улсын хувьд 2018 оноос хойш хөдөлмөрийн хөлсний доод хэмжээгээ нэмэгдүүлсэн анхны тохиолдол болсон байна. Хөдөлмөрийн хөлсний доод хэмжээг нэмэгдүүлэхэд хамгийн их нөлөө үзүүлсэн хүчин зүйл нь тус улс дахь инфляцын эрчимтэй өсөлт гэнэ.
Шийдвэрийн хүрээнд Мьянмарын төрийн өмчит сонины газраас мэдээлснээр хөдөлмөрийн хөлсний шинэчилсэн доод хэмжээ энэ сарын нэгний өдрөөс улс даяар мөрдөгдөж эхэлсэн юм. Улмаар Мьянмар улс дахь хөдөлмөрийн хөлсний доод хэмжээ өдрийн 5,800 кят болжээ.
Эх сурвалж: Nikkei Asia