Умард Солонгосын удирдагч Ким Жон Уны дэглэмтэй холбоотой гэгддэг хакерын бүлэглэл болох Лазарус өнгөрсөн оны долдугаар сараас энэ оны долдугаар сар хүртэлх нэг жилийн хугацаанд 900 гаруй сая ам.долларын криптовалют угаасан гэх мэдээлэл гарчээ.
Олон улсын зах зээл дэх криптовалютыг хянадаг Elliptic компанийн 5-ны өдөр нийтэлсэн тайлангаас иш татан АНУ-ын Чөлөөт Ази радио энэ тухай мэдээлсэн ба тэд "Cross chain" гэх шинэ аргыг ашиглан энэхүү гэмт үйлдлээ хийсэн хэмээн онцолсон байна.
Энэхүү арга нь нэг блокчэйн сүлжээнээс нөгөө блокчэйн сүлжээнд криптовалютыг солилцох замаар явагддаг аж.
Elliptic компанийн тооцоолсноор өнгөрсөн онд дэлхий дахинд “Cross Chain” аргаар дамжуулан 7 тэрбум ам.доллароор хэмжигдэх криптовалютыг угаасан ба үүний долооны нэг буюу хамгийн их хэсэг нь Лазарус бүлэглэлтэй холбоотой байгааг цохон тэмдэглэсэн байна.
Эх сурвалж: MBC