Автомашин үйлдвэрлэлээрээ дэлхийд тэргүүлэгч Японы Тоyota компани сэлбэг, эд анги захиалгын удирдлагын системэд доголдол үүссэний улмаас үйл ажиллагааг нь бүрэн зогсоогоод байсан Япон дахь 14 үйлдвэрийнхээ үйл ажиллагааг сэргээж байгаагаа 30-ны өдөр мэдэгдэв.
Орон нутгийн NHK болон Jiji News агентлагуудын мэдээлснээр Toyota компани "Бид сэлбэг, эд анги захиалгын удирдлагын түр системийг идэвхжүүлснээр энэхүү асуудлыг шийдвэрлэж чадлаа” хэмээн тайлбар хийсэн талаар онцолжээ.
Компанийн зүгээс өмнө нь мэдэгдэхдээ үйл ажиллагааг ийнхүү зогсоохоос аргагүй болсон шалтгаан бол сэлбэг, эд ангийн захиалгын удирдах системийн доголдолтой холбоотой бөгөөд нарийн шалтгааныг судалж байгаа хэмээн дурдаж байсан юм.
Тус компани нь мөн өдрийн өглөө 12 үйлдвэрийнхээ үйл ажиллагааг сэргээсэн бол үлдсэн хоёр үйлдвэр үдээс хойш ажиллаж эхэлсэн болохыг дурджээ.
Япон дахь бүхий л үйлдвэрүүд ийнхүү үйл ажиллагаагаа зогсоосонтой холбогдуулан Тоyota компани цахим халдлагад өртсөн байж болзошгүй гэх таамаг олон нийтийн дунд тархаад байсныг албан ёсоор үгүйсгэсэн байна.
Эргэн сануулахад өнгөрөгч оны гуравдугаар сард Тоyota компанийн ханган нийлүүлэгч сэлбэг, эд анги үйлдвэрлэгч Kojima Press Industries цахим халдлагад өртсөний улмаас тус компани Япон дахь бүхий л үйлдвэрийнхээ үйл ажиллагааг зогсоож байсан удаатай.
Эх сурвалж: Newsis