Пүрэв гарагт BBC сувгаас мэдээлснээр Кени улс саяхан хэрэгжиж эхэлсэн Worldcoin төслийг нутаг дэвсгэрийнхээ хүрээнд зогсоожээ. Үүний шалтгаан нь Кени улсын засгийн газар тус төслийг мэдээллийн аюулгүй байдлын хүрээнд эргэлзээтэй үйл ажиллагаа явуулдаг гэж үзсэн байна.
Саяхан хэрэгжиж эхэлсэн Worldcoin төслийн хувьд хүний нүдээр дамжуулан бүртгэл үүсгэдэг бөгөөд бүртгэл үүсгэсэн хүмүүст крипто токен урамшуулал болгон өгдөг юм. Улмаар Кени улсын иргэд 49 ам.доллартой тэнцэх хэмжээний токеныг авахын тулд урт дараалал үүсгэн тус төсөлд бүртгүүлэх болсон ажээ.
Харин Кени улсын засгийн газраас мэдээллийг мөнгөөр солилцож байгаа эл явдлыг сэжиг бүхий гэж үзсэн байна. Тэдний зүгээс ард иргэдийнхээ мэдээллийг ганц хувийн компанийн гарт өгөх нь тийм ч аюулгүй алхам биш гэжээ.
Тийнхүү тус улсын Дотоод хэргийн яамнаас төслийн хүрээнд мөрдөн шалгах ажиллагаа явуулах болсон бөгөөд аюулгүй байдал, мэдээлэл хамгааллын агентлагуудаа төслийг хэрэгжүүлэгч компани хууль ёсны үйл ажиллагаа явуулж байгаа эсэхийг тогтооход уриалсан байна.
Эх сурвалж: BBC