Pfizer болон BionTech компаниуд орон нутгийн цагаар 25-ны өдөр Ковид-19 цар тахлын шинэ хувилбар болох омикроны эсрэг бүтээсэн вакцины эмнэлзүйн туршилтыг эхлүүлжээ.
Тус 2 компани нь омикрон хувилбарт зориулан бүтээсэн вакцины аюулгүй байдал, зохицол, үр дүнтэй эсэхийг шалгах эмнэлзүйн туршилтыг эхлүүлсэн болохоо хэвлэлийн хурлын үеэр зарлав. Эмнэлзүйн туршилтад хамрагдах 1,420 субъект нь одоо ашиглаж буй цар тахлын эсрэг вакцинд хамрагдсан, мөн нэмэлт тун хийлгэсэн, вакцин хийлгээгүй гэсэн гурван бүлэгт хуваагдах аж.
BioNTech компанийн гүйцэтгэх захирал Угур Сахин хэлэхдээ "бусад хувилбаруудын адилаар омикроноос урьдчилан сэргийлэхийн зэрэгцээ урт хугацааны үйлчилгээтэй вакцин боловсруулах зорилгоор энэхүү судалгааг хийж байна” хэмээн мэдэгджээ.
Хоёр долоо хоногийн өмнө Pfizer болон BionTech компанийн зүгээс омикрон хувилбарт зориулсан вакцин үйлдвэрлэж эхэлснээ зарлаж, эрүүл мэндийн байгууллагууд зөвшөөрвөл ирэх 3-р сар гэхэд уг вакциныг зах зээлд нийлүүлэх боломжтой хэмээн дурдаж байсан билээ.
Европын эмийн агентлагаас (EMA) одоо ашиглаж буй цар тахлын эсрэг вакцинаас гадна зөвхөн омикрон хувилбарт тусгайлан зориулсан вакцин үйлдвэрлэх шаардлагатай эсэх тал дээр мэдэгдэл хийгээгүй байна.
Эх сурвалж: MBC