Тесла компанийн гүйцэтгэх захирал Элон Маск хүн төрөлхтөнд учирч буй хамгийн том аюул бол төрөлт багасч буй асуудал хэмээн тодорхойлжээ.

CNBC болон бусад хэвлэл мэдээллийн хэрэгслүүдийн мэдээлснээр, Маск орон нутгийн цагаар 7-ны өдөр Уолл Стрит Журнал сонины редакцын зүгээс зохион байгуулсан "Гүйцэтгэх захирлуудын зөвлөл" арга хэмжээний үеэр "Дэлхийн хүн ам хангалттай биш байна. Төрөлтийн түвшин хурдацтай буурч байгаа нь соёл иргэншилд учирч буй хамгийн том аюул гэж хувьдаа бодож байна" хэмээн үзэл бодлоо илэрхийлжээ.

Зургаан хүүхдийн эцэг Маск хэлэхдээ "Юмны цаадах наадахыг ойлгодог хүмүүс хүртэл эх дэлхий маань хэт ачаалалтай болж хүн амын өсөлт хяналтаас гарч байна гэж боддог болсон байна. Харин ч энэ бүхэн эсрэгээрээ байгаа” гэж онцлов.

"Хэрэв хүмүүс олон хүүхэдтэй болохгүй бол хүн төрөлхтөний соёл иргэншил сүйрнэ" гэж тэр анхааруулсан байна.

Эх сурвалж: MBC