Өдгөө 53 настай алдарт жүжигчин Ма Дун Согийн тоглосон “Гэмт хэргийн хот”(범죄도시) цуврал кино 10 сая үзэгч байлдан дагуулсан амжилтаа гурав дахь удаагаа хялбархан давтлаа.

Тухайлбал тус цувралын дөрөв дэхь кино нээлтээ хийснээсээ хойш 22 өдрийн дотор буюу энэ сарын 15 гэхэд 10 сая гаруй үзэгчид хүрчээ. Эргэн санавал эл цувралын хоёрдугаар ангийг 12.69 сая, гуравдугаар ангийг 10.68 сая хүн үзжээ.

Насны доод хязгаараа 15 хэмээн тогтоосон бусад гурван ангиасаа ялгаатай нь уг цувралын эхний ангийг өсвөр насны хүүхдүүд үзэх хориотой байснаас, мөн цувралынхаа салхийг хагалж, олонд танигдах эхлэлийг тавьсан зэрэг шалтгаанаас болоод ч тэр үү нэгдүгээр анги нь арай цөөн буюу 6.88 сая хүнд хүрсэн байна.

Ийнхүү “Гэмт хэргийн хот” цувралын үзэлт нийтдээ 40 саяыг давж, Солонгосын түүхэнд анхдагч боллоо.

Дан ганц гол дүрд тоглоод зогсохгүй төлөвлөгөө, зохиол, продакшны ажлуудыг ахлан оролцсон Ма Дун Согийн зарласнаар тус цуврал нийт найман ангитай байх гэнэ.

Зөвхөн Солонгост ч биш, гадны олон оронд тус бүтээл олны анхаарлыг татаж байгаа аж. Монголд нээлтээ хийсэн даруйдаа үзэлтээрээ тэргүүлж, Вьетнамд гэхэд л хоёр долоо хоногшийн дотор 300 мянган тасалбар борлуулжээ. Мөн умард Америкт удаа дараа амжилт гаргаж, цаашлаад, хоёрдугаар ангийг нь Холливуд шинэчлэн хийхээр болсон гэнэ.

Эх сурвалж: Yonhap