Шриланкачууд марксист үзэлтэй Анура Кумара Диссанаякег шинэ ерөнхийлөгчөөр сонгожээ. Ингэснээр авлигатай тэмцэж, сүүлийн хэдэн арван жилийн хугацаан дахь санхүүгийн хамгийн хүнд хямралын дараа эдийн засгийг сэргээхээ амласан түүнд итгэл хүлээлгэсэн байна.

Диссанаяке улс төрчийн гэр бүлээс гаралтай биш бөгөөд саналын хуудсыг тоолох явцад эхнээс нь дуустал тэргүүлж, одоогийн Ерөнхийлөгч Ранил Викрмесингхе, сөрөг хүчний удирдагч Сажит Премадаса нарыг ардаа орхисноор Шри Ланкийн 10 дахь ерөнхийлөгч болжээ.

Энэ удаагийн сонгууль нь их хэмжээний өртэй улс орныг удирдаж байсан Викремсинхегийн хувьд бүх нийтийн санал асуулга болсон бөгөөд эдийн засгийг сэргээх гол түлхүүр болсон хэмнэлтийн арга хэмжээ нь түүнийг албан тушаалдаа улиран сонгогдоход нь саад болсон байна. Тэрбээр 17 хувийн санал авч гуравдугаарт жагсжээ.

Өдгөө 55 настай Диссанаяке 5.6 сая сонгогч буюу 42.3 хувийн санал авсан нь 2019 онд болсон ерөнхийлөгчийн сонгуулиар 3 хувийн санал авч байсантай харьцуулахад эрс өссөн үзүүлэлт боллоо. Ням гарагт саналын хуудсыг тоолж дууссаны дараах байдлаар, С.Премадаса 32.8 хувийн саналаар хоёрдугаарт бичигджээ.

Шри Ланкийн ерөнхийлөгчийн сонгуулийн эхний шатанд нэр дэвшигчдийн хэн нь ч 50-иас дээш хувийн санал авч чадаагүй тул төрийн тэргүүнийг хоёр дахь шатны санал хураалтаар сонгосон бөгөөд энэ нь тус улсын түүхэн дэх анхны тохиолдол болсон байна.

Эх сурвалж: МОНЦАМЭ