Өнгөц харахад ихэнх ажлын байр үндсэн цалинтай, зарим цагийн ажил л хийснээрээ цалинждаг мэт. Гэвч чухамдаа урамшуулал, нэмэлт цалин гэх мэтээр ихэнх ажил их бага хэмжээгээр ажилтны бүтээмжид тааруулж цалин өгдөг билээ. Нөгөө талаас энэ тогтолцоо ажилтнуудад ямар нөлөө үзүүлдгийг мэргэжилтнүүд судалжээ.

Вашингтон болон Аархус их сургуулиудын судлаач нар хийснээрээ цалинжих нь ажиллах хүчинд буюу ажилтнуудад нэлээд сөрөг нөлөөтэй байдгийг тогтоосон байна.

Судалгаа хийхдээ тэд Данийн засгийн газраас авсан 1309 компанийн 300700 гаруй үндсэн ажилчдын 10 жил ажилласан мэдээллийг ашиглажээ. Тус мэдээллээс үзэхэд ажилтнуудын хийсэнд тааруулан цалин өгч эхлэхэд сэтгэл түгших эмгэг, сэтгэл гутралын эм уудаг ажилтнуудын тоо 5,7 хувиар нэмэгдсэн байжээ. Ялангуяа энэ тоо 50-аас дээш насны ажилчдын дунд бараг хоёр дахин их буюу 8.9 хувь байсан гэнэ.

Цаашлаад ийм эм бэлдмэл хэрэглэж, түүнээсээ хамааралтай болсон ажилтнууд тэр жилдээ ажлаасаа гарах магадлал 5-9 хувиар нэмэгдэж байсан аж. Тэр дундаа эмэгтэй ажилтнууд эрэгтэйчүүдээс илүү олноор ажлаа орхиж эхэлсэн байна.

Судалгааны багийн ахлагч Ламар Пирс “Энэ төрлийн сэтгэцийн эрүүл мэндийн асуудлууд компанидаа ч, ажилтандаа ч маш их хортой. Цаашлаад энэ явдал даамжрах тусам гарз хохирол нь үржигддэг” хэмээн ярьжээ.

Эх сурвалж: FastCompany