Архаг мигрень өвчнөө эмчлэхийн тулд хэт их ботокс хэрэглэсэн бүсгүйн хүзүүний булчинд саажилт үүссэн тохиолдол Их Британи улсад гарчээ.

Оррн нутгийн цагаар 21-ний өдөр Британийн The Sun зэрэг хэвлэл мэдээллийн хэрэгслүүд мигрень өвчнөө эмчлэхийн тулд ботокс хийлгэсэн 36 настай Алисиа Халлокийн харамсалтай түүхийг нийтэлсэн байна.

Тэрээр “Би таван жилийн турш гурван сар тутамд ботокс тариулдаг байсан. Гэвч хамгийн сүүлд тарилга хийлгэснээс хойш гурав хоногийн дараа хүзүү минь хөдлөхөө больсон” гэжээ.

Улмаар тарилга хийлгэснээс хойш бүтэн 9 хоног өнгөрөөд байхад байдал дээрдээгүй тул эмнэлэгт очсон ба түүнийг шууд эрчимт эмчилгээний тасагт хэвтүүлсэн байна. Бүсгүй "Хүзүүний булчинд минь саажилт үүссэн учраас толгойгоо ч өргөж чадахгүй байсан. Мөн амьсгалахад маш хүндрэлтэй байснаас гадна дуугарч чадахгүй, юу ч залгиж чадахгүй байсан" хэмээн ярьсан байна. Түүнчлэн хоол идэж чадахгүй байсан тул гуурсаар дамжуулан эм ууж, хооллож байсан хэмээн тайлбарлав.

Азаар Алисиагийн эмчилгээ үр дүнгээ өгч тэрээр 18 хоногийн дараа эмнэлгээс гарсан бөгөөд одоогоор гэрээр эмчилгээ хийлгэж байгаа аж. Эмч нарын зүгээс Алисиагийн “ботулизм" гэжээ. Тэрээр үргэлжлүүлэн "Эмнэлгээс гарснаас хойш 4-6 долоо хоногийн дараа хүзүүний булчин эргэн сэргэнэ гэж хэлсэн” хэмээн өгүүлсэн байна.

Ботулизм нь ботулиний хорт бодисоор үүсгэгддэг өвчин юм. Ботулизмаас үүссэн хорт бодис нь мэдрэл, тархи, нугасанд очин саажилт үүсгэдэг аж.

Ботокс гэдэг нь ботулинумын токсины худалдааны нэршил бөгөөд бүсгүйг хариуцан эмчилж байсан эмч хэвлэлд өгсөн ярилцлагадаа “Бид хоол хүнснээс болж ботулизмаар оношлогдсон өвчтөнүүдийг эмчилж байсан тохиолдол байдаг ч ботокс тариулснаас болж ботулизмаар оношлогдсон хүн анх удаа л харж байна” хэмээн ярьжээ.

Алисиа нь архаг мигрень өвчнийхөө шинж тэмдэгийг дарахын тулд ботокс тарилгыг хийлгэдэг байжээ. Мигрень нь тархины мэдрэлийн судаснуудын үйл ажиллагааны доголдолоос үүдэлтэй үүсдэг толгойн өвчин бөгөөд ботокс нь тархинд өвдөлт үүсгэгч нейротрансмиттерийн нийлэгжилтийг дарангуйлснаар толгойн өвдөлтийн шинж тэмдгийг бууруулдаг байна.

Сард 15-аас дээш хоног, цаашлаад 3 сарын турш толгой нь тасралтгүй өвддөг архаг мигрень өвчтэй хүмүүст ботокс тарилга хийлгэхийг эмч нар зөвлөдөг юм.

Эх сурвалж: Hankyung