Швед улсыг Умард Атлантын гэрээний байгууллага буюу НАТО-д элсүүлэх тухай парламентын шийдвэрийг Туркийн Ерөнхийлөгч Режеп Тайип Эрдоган баталлаа.

Р.Эрдоган Шведийг НАТО-д элсүүлэх тухай ерөнхийлөгчийн зарлигт гарын үсэг зурж, холбогдох протоколыг батлав гэж Туркийн Ерөнхийлөгчийн Тамгын газраас олон нийтийн сүлжээнд нийтэлсэн мэдэгдэлд дурдсан байна.

Шведийн Хаант Улсыг НАТО-д элсүүлэх тухай протоколыг соёрхон батлах тухай хууль Туркийн “Албан ёсны товхимол”-д пүрэв гарагт нийтлэгдсэнээр хүчин төгөлдөр болжээ.

Ийнхүү 2022 оны долоодугаар сарын 5-нд Брюссель хотноо гарын үсэг зурсан “Шведийн Хаант Улсыг НАТО-д элсүүлэх тухай протокол” эцэслэн батлагдлаа.

Шведийн Ерөнхий сайд Ульф Кристерссон Турк улсын гаргасан шийдвэрийг сайшааж, эл үйл явдлыг "НАТО-гийн бүрэн эрхт гишүүн болох замын шийдвэрлэх үе шат" гэж мэдэгджээ.

Эх сурвалж: Anadolu /МОНЦАМЭ агентлаг/