Гал зогсоох шинэ гэрээний хүрээнд Газын зурвасыг орхин гарах саналыг Израилын тал Палестины хэт давруу үзэлтнүүдийн ХАМАС хөдөлгөөний удирдагчдад тавьсан тухай CNN суваг албаны хоёр хүний ярьснаас эш татан мэдээлжээ.

Уг санал нь ХАМАС-ын удирдагчдад Газын зурвасаас аюулгүй гарах боломжийг олгох боловч “бүс нутагт тогтоосон ХАМАС-ын хяналтыг сулруулж", гадаадад тэднийг хянах боломжийг Израилын эрх баригчдад олгоно.

Дөрвөн сар үргэлжилсэн мөргөлдөөний явцад Израилын тал Газын зурваст ХАМАС бүлэглэлийн нэг ч өндөр албан тушаалтныг олзолж эсвэл хөнөөж чадаагүй гэдгийг CNN суваг дурджээ. Тус сувгаар мэдээлснээр, ХАМАС-ын удирдагчид Катар, Ливан зэрэг улсуудын нутаг дэвсгэрт байгаа аж.

Дээрх саналыг сүүлийн долоо хоногт хоёр удаа хэлэлцсэн боловч ХАМАС-ынхан ийм нөхцөлийг зөвшөөрөх магадлал бага юм.

Үүний сацуу АНУ-ын Ерөнхийлөгчийн үндэсний аюулгүй байдлын асуудал эрхэлсэн туслах Жонатан Фейнер, Ерөнхийлөгч Жо Байдены засаг захиргаа Израилын эрх баригчдыг өргөн цар хүрээтэй ажиллагаа явуулахад бус ХАМАС-ын удирдлагын эсрэг чиглэсэн тэмцэлд анхаарлаа хандуулахыг хүсэж байгааг мэдэгдсэн байна. Газын зурвас дахь байлдааны ажиллагааны эрчмийг Израилын тал сулруулах цаг нэгэнт болсон гэж Вашингтон үзэж байгаа бөгөөд эл асуудлыг Израилын эрх баригчидтай хэлэлцэж байна гэж Цагаан ордны Үндэсний аюулгүй байдлын зөвлөлийн стратегийн харилцаа холбооны зохицуулагч Жон Кирби өнгөрсөн долоо хоногт мэдэгджээ.

Эх сурвалж: CNN /МОНЦАМЭ агентлаг/