Далайн худалдааны томоохон зам болох Улаан тэнгисийг тойрсон цэргийн хурцадмал байдал нэмэгдэхийн хэрээр түүгээр өнгөрч буй хөлөг онгоцнуудын дайны эрсдэлийн даатгалын хураамж хэдхэн долоо хоногийн дотор арав дахин нэмэгдсэн гэж Bloomberg News агентлаг мэдээлэв.
Bloomberg News агентлаг нэрээ нууцалсан олон эх сурвалжаас иш татан, даатгалын компаниуд өдгөө Улаан тэнгисээр дамжин өнгөрөх хөлөг онгоцны үнийн дүнгийн 0.75-1.0 хувьтай тэнцэх хэмжээний дайны эрсдэлийн даатгалын хураамж авч байгаа нь хэдхэн долоо хоногийн өмнөхөөс 10 дахин өссөн үзүүлэлт болохыг онцолжээ.
Reuters агентлаг ч мөн эх сурвалжуудаас иш татан мэдээлснээр, дайны эрсдэлийн даатгал өнгөрсөн долоо хоногт л гэхэд хөлөг онгоцны үнийн дүнгийн 0.7 хувьтай тэнцэж байсан бол энэ долоо хоног гарсаар ойролцоогоор 1 хувь болж өссөнөөс гадна цаашид ч өсөх хандлага үргэлжлэх төлөвтэй байгааг дурдсан байна.
Үүгээр ч зогсохгүй дайны эрсдэлийн даатгалын хүчин төгөлдөр хугацаа энэ сарын эхэн үе хүртэл долоо хоног байсан бол өдгөө 24 цаг болж богиносоод байгаа аж.
Эдгээр шалтгаануудын улмаас хөлөг онгоцны эзэд болон түрээсийн компаниуд даатгалын хураамж болон Суэцийн сувгаар дамжин өнгөрөх хураамжийг эрс нэмэгдүүлсэн зардлаар Улаан тэнгисийг ашиглах уу, эсвэл Африкийн Найдварын хошуугаар тойрч явах уу гэсэн сонголтын өмнө тулгарах болжээ.
Хэрэг явдлыг эргэн сануулахад Йемен дэх Ираныг дэмжигч хусит босогчид өнгөрсөн оны арваннэгдүгээр сараас хойш Израильтай дайтаж байгаа Хамас бүлэглэлийг дэмжих нэрийдлээр Улаан тэнгисээр дамжин өнгөрч буй хөлөг онгоцнууд руу дайрч, хохирол учруулсаар байгаа билээ.
Эх сурвалж: MBC