Тесла компани Хятадын зах зээлд борлуулагдсан 1.62 сая орчим автомашинаа эргүүлэн татахаар шийдсэн тухай Хятадын төв телевиз мэдээлэв.
Тодруулбал тус компани 2014 оноос өнгөрсөн он хүртэл зарагдсан аюулгүй байдлын асуудалтай 1.62 сая орчим автомашиныг эргүүлэн татах төлөвлөгөөгөө Хятадын Зах зээлийн зохицуулалтын албанд хүргүүлжээ.
Энэхүү шийдвэрийн хүрээнд Model S, Model X, Model 3, Model Y зэрэг ангиллын автомашинуудыг эргүүлэн татах аж.
Автомат жолоодлогын туслах функц ажиллаж байх үед бусад тээврийн хэрэгсэлтэй мөргөлдөх магадлал бүхий 1.610.105, ослын үед хаалга нь онгойх эрсдэлтэй 7.538 тээврийн хэрэгслийг эргүүлэн татах гэнэ.
Энэ удаад эргүүлэн татаж буй автомашины асуудлыг алсын зайнаас шийдэхээр Тесла төлөвлөж байгаа аж.
Сонирхуулахад өнгөрөгч оны тавдугаар сард тус компани анхааруулах дохионы ажиллагаа нь асуудалтай 1.1 сая гаруй автомашиныг Хятадын зах зээлээс эргүүлэн татаж байсан билээ.
Эх сурвалж: YTN