АНУ-ын Ерөнхийлөгч Жо Байден Украины Ерөнхийлөгч Володимир Зеленськийтэй уулзахаар мягмар гарагт түүнийг Цагаан ордонд урьжээ. Талууд Оросын эсрэг үргэлжилж буй дайны талаар, мөн Украины батлан ​​хамгаалах хүчин чармайлтыг АНУ үргэлжлүүлэн дэмжихийн “амин чухал ач холбогдлыг” хэлэлцэнэ.

Цагаан ордноос ням гарагт мэдэгдсэнээр, Украинд тулгамдаж буй “яаралтай хэрэгцээ”-ний талаар хэлэлцэх ажээ. Цагаан ордон Украин, Израилд цэргийн тусламж үзүүлэх талаар Конгресстэй тохиролцохыг эрмэлзэж байгаа энэ үед энэхүү уулзалт болох гэж байна.

Украины удирдагч ажлын айлчлал хийхээр даваа гарагт Вашингтонд хүрэлцэн ирэх бөгөөд Ж.Байдентай “цуврал уулзалт, хэлэлцүүлэг” хийнэ гэж В.Зеленськийн ажлын алба ням гарагт Telegram хуудсаараа мэдэгджээ.

В.Зеленськийг мөн орон нутгийн цагаар мягмар гаргийн өглөөний 9 цагт Капитолын танхимд АНУ-ын сенатчдад хандан үг хэлэхийг урьсан гэж Сенатын танхимын төлөөлөгч ням гарагт мэдээлсэн байна. В.Зеленський, АНУ-ын Төлөөлөгчдийн танхимын дарга Майк Жонсон нарын уулзалт мягмар гарагт мөн Капитолд болно гэж М.Жонсоны хэвлэлийн төлөөлөгч Раж Шах Reuters агентлагт цахим шуудангаар мэдээлжээ.

В.Зеленсвкийн ажлын албанаас мэдээлснээр, айлчлалын үеэр АНУ, Украины батлан хамгаалах салбарын хамтын ажиллагаа, зэвсэг, агаарын довтолгооноос хамгаалах систем үйлдвэрлэх хамтарсан төслүүд зэрэг асуудлуудыг хэлэлцэхээр төлөвлөж байна.

Эх сурвалж: The Reuters/МОНЦАМЭ агентлаг/