АНУ-ын Alaska Airlines авиа компани өөрийн өрсөлдөгч Hawaiian Airlines-ийг 1.9 тэрбум ам.доллароор худалдаж авахаар болжээ.
Wall Street Journal болон Associated Press агентлагийн орон нутгийн цагаар 3-ны өдөр мэдээлснээр, Alaska Airlines компани Hawaiian Airlines-ийн 900 сая ам.долларын өрийг оролцуулаад, нэгж хувьцаанд 18 ам.доллар бэлнээр төлж худалдан авахаар болсноо мэдэгдэв.
Энэхүү нэгдэх үйл явц 12-18 сарын хугацаанд үргэлжлэх төлөвлөгөөтэй байгаа аж. Тус хоёр компани нэгдсэнийхээ дараа ч өөрсдийн брэндинг болон нэршил зэргээ үргэлжлүүлэн бизнесийн үйл ажиллагаандаа ашигласаар байх болно гэдгээ мөн онцолсон байна.
Холбогдох байгууллагууд энэхүү худалдан авалтыг баталж, эцэслэн шийдвэрлэсэн тохиолдолд Alaska Airlines-ийн нисэх онгоцны парк 300-аас 365 болж нэмэгдэх аж. Түүнчлэн дотоодын нислэгээс гадна Ази, Австрали, Номхон далайн өмнөд хэсэгт хийх олон улсын 29 гол чиглэл зэргийг оролцуулаад нийт 138 чиглэлд нислэг үйлддэг болох гэнэ.
Эх сурвалж: Asiae