Пүрэв гарагт ТАСС мэдээллийн агентлагаас мэдээлснээр ОХУ-ын ерөнхийлөгч Владимир Путин Цөмийн туршилтыг бүрэн хориглох гэрээг соёрхон баталсныг түдгэлзүүлэх тухай хуулийг баталж, гарын үсэг зуржээ.

ОХУ-ын хувьд 1996 оны есдүгээр сарын 24-д Нью-Йорк хотноо өөрсдийн нэрийн өмнөөс үзэглэж байсан бөгөөд 2000 оны тавдугаар сарын 27-д соёрхон баталж байсан юм.

Гэрээний гол зорилго нь цөмийн зэвсэгтэй эсхүл цөмийн зэвсэг бүтээх нөөц бололцоотой нийт 44 улс орон бүгд гэрээг соёрхон баталснаар хүчин төгөлдөр болж, талууд цөмийн зэвсгийн туршилт хийх аваас туршилтыг энэхүү гэрээний тусламжтайгаар зогсоох байсан билээ. Гэсэн хэдий ч тус гэрээ өдийг хүртэл хүчин төгөлдөр болоогүй юм. Учир нь гэрээг найман улс соёрхон батлаагүй байжээ.

Тийнхүү ерөнхийлөгч Владимир Путин тус хуулийг баталснаар баримт бичиг нь олон нийтэд албан ёсоор нийтлэгдсэн өдрөөс эхлэн хүчин төгөлдөр үйлчлэх гэнэ. Гэхдээ ОХУ-ын зүгээс соёрхон баталснаа түдгэлзүүлж буй явдал нь тэд гэрээнээс гарч байгаа гэсэн үг биш юм.

Үйл явдлын хүрээнд Кремлийн хэвлэлийн төлөөлөгчийн хэлснээр гэрээг соёрхон баталснаа түдгэлзүүлснээр Вашингтон хийгээд Москвагийн талууд цөмийн зэвсэг турших нөхцөлийн хүрээнд эрх тэгш болж байгаа гэсэн байна. Учир нь Вашингтоны талаас уг гэрээг хэзээ ч соёрхон баталж байгаагүй ажээ.

Эх сурвалж: ТАСС