Тайвань, Хятадын хооронд цэргийн хурцадмал байдал нэмэгдэж байгаа энэ үед Тайванийн арми 1000 хол давсан тооны цэрэг армийн зориулалт бүхий нисгэгчгүй нисэх төхөөрөмж худалдан авахаар төлөвлөжээ. Энэхүү шийдвэрийнхээ хүрээнд 5 тэрбум Тайвань долларыг батлан хамгаалахын төсөвтөө суулгаж өгөхөөр болсон байна.

Тайванийн Үндэсний батлан ​​хамгаалах яам орон нутгийн цагаар 31-ний өдөр Үндэсний ассамблейд өргөн мэдүүлсэн ирэх оны батлан ​​хамгаалахын төсөвт армийн зориулалттай 392, тэнгисийн цэргийн хүчинд 1072, агаарын хүчинд 315 ширхэг гээд нийт 1779 ширхэг нисгэгчгүй нисэх төхөөрөмж худалдан авахаар төлөвлөж байгаа талаар China Times сонин 1-ний өдөр мэдээлэв.

Тайванийн арми Украины дайнаас сургамж авч, нисгэгчгүй нисэх төхөөрөмжөөр дамжуулан арми, тэнгисийн цэрэг, агаарын хүчин гэсэн гурван хүчний тандалт, тагнуул, үйл ажиллагааны чадавхийг бэхжүүлж буй хэрэг юм хэмээн орон нутгийн хэвлэлүүд онцолсон байна.

Тэр дундаа Хятадтай харьцуулахад цэрэг армийн чадавхийн хувьд доогуур үзүүлэлттэй Тайвань нь нисгэгчгүй нисэх төхөөрөмжийг Хятадын армийг сөрж зогсоход томоохон хүчин зүйлийн нэгд тооцож байгаагийн илрэл юм. Учир нь Украины арми нь нисгэгчгүй нисэх төхөөрөмж ашиглан Оросын армийн эсрэг тун амжилттай ажиллагаа явуулж буйг Тайванийн тал сайтар судалж байгаа гэдгийг мэргэжилтнүүд баталж байгаа билээ.

Эх сурвалж: MBC