Dove саван, Cornetto мөхөөлдсийг үйлдвэрлэн нийлүүлдэг Unilever компани ОХУ-ын зах зээлийг орхихоос татгалзсан шийдвэрээ өмгөөлжээ.

ОХУ Украины нутаг дэвсгэрт эзлэн түрэмгийлэх ажиллагаа явуулаад өдгөө нэг жил гаруйн хугацаа өнгөрч байгаа бөгөөд барууны бизнес эрхлэгчид тус ажиллагааг эсэргүүцэн Оросын зах зээлийг орхих болсон юм. Харин Unilever компанийн зүгээс Оросын зах зээлийг орхихоос татгалзаж, одоог хүртэл тус улсын нутаг дэвсгэрт үйл ажиллагаагаа явуулсаар байгаа билээ.

Тэгвэл мягмар гарагт BBC сувгаас нийтэлсэн мэдээнд өгүүлснээр Unilever компани тус шийдвэрээ өмгөөлсөн мэдэгдэл хийсэн байна.

Тэдний мэдэгдсэнээр, “ОХУ-ын зах зээлийг орхих нь тийм ч шударга алхам биш. Учир нь бидний зүгээс тус улсын зах зээлийг орхих шийдвэр гаргаваас Оросын засгийн газар манай тус улс дахь үйл ажиллагааг өөрсдийн мэдэлд шилжүүлнэ.

Манай талаас Оросын засгийн газрыг санхүүжүүлэхгүйгээр, ажилтнуудаа хохироохгүйгээр тус улс дахь бизнесийн үйл ажиллагаагаа худалдах аргыг эрэлхийлж байгаа ч энэ нь тун ярвигтай байгаа. Тиймээс хатуу хязгаарлалтын дор бизнесийн үйл ажиллагаагаа үргэлжлүүлэх нь одоогийн нөхцөлд хамгийн оновчтой гаргалгаа болоод байна” гэжээ.

Эх сурвалж: BBC