Ням гарагт Турк улсын ерөнхийлөгчийн сонгуулийн хоёрдугаар шат зохион байгуулагдаж, ерөнхийлөгч Режеп Тайип Эрдоган, Кемал Киличдароглу нар өрсөлдсөн билээ.

Тэгвэл сонгуулийн нэгдсэн дүнгээр ноён Эрдоган 51.92 хувийн саналаар ялалт байгуулжээ. Тийнхүү Режеп Тайип Эрдоган ерөнхийлөгчийн албыг дахин таван жил хаших болсон байна.

Үйл явдлын хүрээнд тэрээр Анкара хотоос дэмжигч олондоо хандан үг хэлэхдээ, “85 сая хүн амтай улс маань бүхэлдээ ялалт байгууллаа” хэмээсэн юм.

Гэвч түүний өрсөлдөгч Кемал Киличдароглугийн зүгээс ялагдлаа хүлээн зөвшөөрөөгүй байна. Түүний дүгнэснээр энэ удаагийн ерөнхийлөгчийн сонгууль нь сүүлийн хэдэн жилд зохион байгуулагдсан сонгуулиудаас хамгийн шударга бус сонгууль боллоо гэжээ. Ноён Киличдароглугийн үзэж байгаагаар ноён Эрдоганы нам түүний эсрэг авч болох бүх л аргыг ашигласан гэнэ.

Эх сурвалж: BBC