Пүрэв гарагт ОХУ-ын Холбооны Аюулгүй байдлын Албанаас мэдээлснээр тэд Уолл Стрит Журнал сонины сурвалжлагч Эван Гершковичыг тагнуулын үүрэг гүйцэтгэсэн байж болзошгүй хэргээр саатуулсан гэжээ.
КГБ-ын залгамж халаа гэгддэг Холбооны Аюулгүй байдлын Албаны хэлснээр Эван Гершкович Уралийн нуруу дахь Екатеринбург хотод өндөр нууцлалтай мэдээлэл авах гэж байхдаа баривчлагдсан юм.
Оросын хэвлэл мэдээллүүдийн мэдээлж байгаагаар Эван Гершкович нь Украин дахь дайны тухай болон Оросын Вагнер гэх хөлсний бүлгийн тухай мэдээлэл цуглуулж байсан гэнэ.
Гэвч Холбооны Аюулгүй байдлын Албанаас сурвалжлагчийг хэзээ баривчилсан тухай тодорхой мэдээлэл өгөөгүй ажээ.
Хэрэв Гершкович тагнуулаар ажиллаж байсан нь батлагдвал тэр 20 хүртэлх жилийн ял сонсох юм.
Эван Гершковичийн хувьд Хүйтэн Дайнаас хойш ОХУ-ын талаас тагнуулын хэргээр саатуулсан анхны америк сурвалжлагч болж байгаа бөгөөд хэвлэл мэдээллийнхний анхааруулж байгаагаар хэрэг хүндэрвэл, Украин дахь дайны хүрээнд үүссэн хурцадмал байдал бүр л дордож магадгүй ажээ.
Эх сурвалж: Al Jazeera