Титаник киноны дуугаараа олны хайр хүндэтгэлийг хүлээх болсон дуучин Селин Дион SPS буюу Stiff Person Syndrome(Хатуу хүний хам шинж) гэх аутоиммун өвчин мэдрэлийн эмгэгтэй хавсардаг ховор төрлийн хам шинжтэй болжээ. Энэ талаар тэрээр өөрийн Инстаграм хуудаснаа мэдэгдсэн байна.
Түүний тайлбарласнаар энэхүү хам шинж хүний булчинг ямар ч хяналтгүйгээр татахад хүргэдэг тул түүнд алхах, дуулах нь ихээхэн хүндрэлтэй байгаа гэнэ. Улмаар Селин Дион 2023 онд Их Британи, Европ тивээр аялан тоглолт хийхээр төлөвлөөд байсан товоо бүтэн нэг жилээр хойшлуулахад хүрчээ.
Өдгөө 54 настай Селин Дионы хувьд 2014 онд уран бүтээлээсээ тодорхойгүй хугацаагаар завсарлаж байгаагаа мэдэгдэж, 2015 онд урлагийн тайзнаа эргэн гарсан ч 2016 онд ахин завсарлага авах болсон юм. Тийнхүү 2019 он уран бүтээлдээ эргэн орсон Селин энэ оны тавдугаар сараас есдүгээр сарын хооронд Европ тивээр аялан тоглолт хийхээр төлөвлөж байсан ч эрүүл мэндийн шалтгааны улмаас тоглолтыг 2023 оны хоёрдугаар сараас аравдугаар сар руу шилжүүлж, хойшлуулсан билээ. Тэгвэл энэ удаа түүний тоглолт дахин хойшлогдож, 2024 онд товлогджээ.
Ташрамд дурдахад энэ хам шинж сая хүн тутамд нэг удаа тохиодог юм. Тиймээс тус хам шинжийг эмчлэх эмчилгээ одоогоор байхгүй, зөвхөн явцыг нь удаашруулдаг эм байдаг гэнэ. Үүнд, сэтгэл зовнил арилгах эм, булчин суллах бэлдмэл багтдаг байна. Харин хам шинж хүнд шатандаа орвол хүн алхах, хөдлөх боломжгүй болж, гэрээсээ ч гарч чадахаа байдаг юм. Учир нь чанга дуу чимээ ч булчинг таталт өгөхөд нөлөөлж болох ажээ.
Эх сурвалж: BBC