Пүрэв гарагийн орой Тесла нэг цэнэглэлтээр 500 миль буюу 800 километр туулах чадвартай Semi цахилгаан ачааны машиныхаа анхны нийлүүлэлтийг хийжээ.
Тэдний хувьд тус хүнд даацын машиныг анх танилцуулснаасаа хойш ийнхүү 5 жилийн дараа зах зээлд албан ёсоор нийлүүлж байгаа нь энэ юм.
Сонирхуулахад Tesla Semi ачааны машиныг анхлан хүлээж авсан захиалагч нь Пепси, 7Up зэрэг ундааны барааны тэмдэгтийг эзэмшигч, үйлдвэрлэн нийлүүлэгч ПепсиКо компани байжээ.
2017 онд тус машины анхны загварыг танилцуулахад Теслагийн гүйцэтгэх захирал Илон Маск ачааны машины үйлдвэрлэл 2019 онд эхэлнэ хэмээн мэдэгдэж байсан юм. Гэвч одоогийн байдлаар тус ачааны машинаас нийт хэдийг үйлдвэрлэсэн болон хэдийг нийлүүлэлтэд гаргахаар төлөвлөсөн тухай тодорхой мэдээлэл үгүй ажээ.
Tesla Semi загварын хүнд даацын машины хувьд нийт 37,000 килограмм ачаа тээвэрлэх чадвартай бөгөөд 3 цахилгаан мотортой юм.
Эх сурвалж: CNN