ХБНГУ-ын канцлер асан Ангела Меркель засгийн эрхийг барьж байх хугацаандаа ОХУ-ын хүрээнд баримталж байсан бодлогоо хамгаалж, Оросын эзлэн түрэмгийлэл эхлэхээс өмнө түүнд ерөнхийлөгч Владимир Путинд нөлөөлөх эрх мэдэл байгаагүй хэмээн мэдэгджээ.
Хатагтай Меркелийн хэлснээр тэрээр 2021 оны зун Францын ерөнхийлөгч Эммануэль Макрон болон ОХУ-ын ерөнхийлөгч Владимир Путинтэй хамт Европын хэлэлцээг хийхийг оролдсон гэнэ. Энэ талаар тэрээр Германы Шпигель сонинд өгсөн ярилцлагадаа дурдсан байна.
Ярилцлагад өгүүлснээр, “Харамсалтай нь надад тийм эрх мэдэл байгаагүй. Намайг наймдугаар сар гэхэд эрх мэдлээ хүлээлгэн өгөхийг хүн бүр л мэдэж байсан. Тухайн үед нэг зүйл маш тодорхой байсан нь “улс төрийн эрх мэдлийн хүрээнд чиний цаг дууссан” гэдэг юм. Харин Владимир Путины хувьд зөвхөн эрх мэдэл л чухал.
Бидний хамгийн сүүлийн уулзалтад тэр гадаад хэргийн сайдаа дагуулан ирсэн. Тэр уулзалтаас өмнө нь бид үргэлж ганцаарчлан уулздаг байсан” гэсэн юм.
Түүний ийн мэдэгдэх болсон шалтгаан нь олон ч хүн Ангела Меркель болон Европын бусад удирдагч нарыг засгийн эрхэнд байх хугацаандаа Кремлийн эсрэг илүү хатуу чанга байр суурьтай байх ёстой байсан гэж буруутгах болсонтой холбоотой билээ.
Эх сурвалж: BBC