Японы Татварын үндэсний агентлаг “Sake Viva!” хэмээх кампанит ажил санаачлан залуу үеийнхнийг согтууруулах ундаа хэрэглэхийг уриалж байна. Энэхүү уриалга нь үнэндээ татварын орлогоо нэмэх зорилготой ажээ.
Японы алкохолын зах зээл сүүлийн жилүүдэд хумигдаж байгаа нь тус улсын хүн ам зүйн онцлог болон цар тахлаас үүдэлтэй юм. Татварын агентлагийн мэдээлснээр 2020 он хүртэлх 25 жилийн хугацаанд согтууруулах ундааны хэрэглээ 25 хувиар буурч нэг хүний нэг жилийн дундаж хэрэглээ 75 литр болсон аж. Мөн 2020 оны санхүүгийн жилд архины төрлийн бүтээгдэхүүний татварын орлого 8.4 тэрбум ам.доллар байсан нь өмнөх оноос 813 сая ам.доллароор буурсан үзүүлэлт юм. Энэхүү эдийн засгийн шалтгаанаас гадна япон залуус ганцаардмал, хамт олонтойгоо идэвхтэй харилцахгүй байх шинж ажиглагдсан тул ийнхүү уриалга гаргахад нөлөөлсөн гэж мэдээллээ. Харин тус улсын Эрүүл мэндийн яамнаас уг тэмцээний тухайд ямар нэг тайлбар өгсөнгүй.
Тэмцээнд оролцогч 20-39 насны залуус Японы уламжлалт архи уух соёлыг сэргээхэд туслахуйц “бизнес төлөвлөгөө” боловсруулах ёстой юм. Гэвч уг төлөвлөгөө зөвхөн сакегээр хязгаарлагдахгүй. Шар айраг, виски зэрэг ямар ч төрлийн согтууруулах ундааны бизнесийг дэмжих агуулгатай байж болно. Материалыг есдүгээр сарын 9 хүртэл хүлээн авч арваннэгдүгээр сард ялагчийг тодруулан Токиод урих ажээ.
Эх сурвалж: The Washington Post, BBC