Өнгөрөгч долдугаар сард Их Британи улсын хэрэглээний үнийн индекс сүүлийн 40 жилийн хугацаанд анх удаа хоёр оронтой тоо руу оржээ.
Тус улсын Үндэсний статистикийн хорооны орон нутгийн цагаар 17-ны өдөр мэдээлснээр, хэрэглээний үнийн индекс өнгөрөгч долдугаар сард өмнөх оны мөн үетэй харьцуулахад 10.1 хувиар өссөн болохыг онцолсон байна. Ингэснээр 1982 оны хоёрдугаар сараас хойших хамгийн өндөр үзүүлэлт болжээ. Түүнчлэн энэ оны зургадугаар сард 9.4 хувийн өсөлтийг үзүүлснээс ч өндөр байгаа юм.
Их Британийн төв банк (BOE) өнгөрсөн сард бодлогын хүүгээ 0.5 нэгж хувиар өсгөснөөс гадна эрчим хүчний үнэ ихээхэн нэмэгдэж байгаагийн нөлөөгөөр энэ оны эцсээр инфляцийн түвшин 13 хувиас давна хэмээн таамаглал дэвшүүлсэн байна.
Үндэсний статистикийн хорооны зүгээс өнгөрсөн сард инфляци ийнхүү өсөх болсон үндсэн шалтгааныг гол нэрийн хүнсний бүтээгдэхүүн (12.7%) болох талх, үр тариа, сүү, бяслаг, өндөгний үнэ мэдэгдэхүйц өссөнтэй холбоотой гэж тайлбарлав.
Эх сурвалж: Asiae