Tesla-ийн гүйцэтгэх захирал Илон Маск өчигдөр Twitter хуудаснаа алдарт Manchester United багийг худалдан авахаар болсон тухай нийтэлсэн. Гэвч дөрвөн цаг гаруйн дараа “тоглосон юм” гэсэн тайлбартайгаар ямар ч спортын баг худалдаж авахгүй гэв.
Гэтэл Manchester United бол 2012 оноос хойш Нью-Йоркийн хөрөнгийн биржид бүртгэлтэй хувьцаат клуб юм. Улмаар дээрх мэдэгдлийн улмаас өнөөдөр арилжаа нээгдэх үед Manchester United-ийн хувьцаа 17 хувиар огцом өссөн бөгөөд удалгүй буцаад буужээ. Премьер лигт 13 удаа түрүүлсэн Manchester United баг өдгөө Forbes-ийн тооцоогоор 4.6 орчим тэрбум ам.доллароор үнэлэгдэж байна.
Маскийн “жиргээ” хувьцааны зах зээлд нөлөөлж байсан түүх цөөн биш. Тэрбээр 2018 онд Tesla-ийг хувьд шилжүүлж авах тухай “шоглоомоосоо” болж үнэт цаасны залилан хийсэн хэрэгт унаснаас гадна Tesla-ийн тухай мэдээллийг нийгмийн сүлжээнд нийтлэхийн өмнө хянадаг “жиргээний хянагч” хэмээх шинэ албан тушаал үүсгэхэд хүргэсэн билээ. Мөн тавдугаар сарын 17-нд Twitter-ийг 44 тэрбум ам.доллароор авах ажил “урагшлах боломжгүй болсон” тухай бичсэнээр дахин хууль, хяналтынхны хараанд өртөөд байгаа юм.
Эх сурвалж: Bloomberg