Хятадын Сычуань мужид хэт халж, ган гачиг нүүрлэж буйгаас цахилгаан, эрчим хүчний хомсдол үүссэн нь Японы Тоёота Мотор болон дэлхийн хамгийн том цахилгаан автомашины батерей үйлдвэрлэгч CATL компаниудыг тус орон нутаг дахь үйлдвэрүүдийнхээ үйл ажиллагааг түр зогсоохоос аргагүй байдалд хүргэжээ.
Bloomberg News сувгийн мэдээлснээр, Тоёота Мотор компани Сычуань мужийн төв Чэнду хот дахь үйлдвэрийнхээ үйл ажиллагааг энэ сарын 20-ны өдрийг хүртэл зогсоох шийдвэр гаргасан байна.
CATL компани ч мөн Сычуань мужийн Ибинь хотод байрлах батерейны үйлдвэрээ 20-ны өдрийг хүртэл ажиллуулахгүй байхаар шийджээ.
БНХАУ-ын батерейны үйлдвэрлэлийн зангилаа болсон Сычуань мужид сүүлийн үед цаг агаар хэт халж буйн улмаас цахилгаан эрчим хүчний хэрэглээ нэмэгдээд зогсохгүй ган гачгаас болж усан цахилгаан станцын үйлдвэрлэл багассан нь эрчим хүчний хомсдолд оруулаад байна.
Эх сурвалж: MBC