TikTok-ийн толгой компани болох ByteDance Хятадад дээд зэрэглэлийн эмнэлгийн сүлжээ компани худалдаж авсан байна. Amcare Healthcare хэмээх тэрхүү компани нь 2006 онд Бээжинд байгуулагдсан бөгөөд хүүхэд, эмэгтэйчүүд, эх барих чиглэлээр дагнан үйлчилгээ үзүүлдэг ажээ.
Хоёр тал уг худалдан авалтыг үнэн болохыг баталсан боловч үнэлгээ болоод шалтгаанаа дэлгэрэнгүй тайлбарласан ямар нэг албан мэдэгдэл хийгээгүй байна. Гэвч Bloomberg уг худалдан авалтын үнийн дүнг 1.5 тэрбум орчим ам.доллар гэж тооцоод байгаа юм.
Сүүлийн жилүүдэд технологийн компани эрүүл мэндийн салбарт нэвтэрч үйл ажиллагаагаа өргөжүүлэх хандлага дэлгэрч байна. Тухайлбал, Amazon долоодугаар сард 182 салбар нэгжтэй One Medical компанийг 3.9 тэрбум ам.доллароор худалдаж авахаар тохирсон тухай албан мэдэгдэл гаргасан билээ. Мөн Apple-ийн гүйцэтгэх захирал Тим Күүк "Манай компанийн хүн төрөлхтөнд оруулах хамгийн том хувь нэмэр нь эрүүл мэнд байх болно” гэж хэлсэн удаатай. Харин одоо Tik Tok эх, нялхсаар мэргэшсэн эмнэлэгтэй ийнхүү нэр холбогдож байна.
Эх сурвалж: CNBC