Пүрэв гарагт Европын Холбоо, Шинэ Зеланд улс нар 4 жил хэлэлцсэн чөлөөт худалдааны гэрээгээ эцсийн байдлаар боловсруулж, түншлэлийн харилцаагаа бэхжүүлжээ.
Европын Холбооноос мэдэгдсэнээр шинэхэн гэрээний хүрээнд тэдний хоорондын худалдаа 30 орчим хувиар өсөх тооцоотой байгаа юм. Улмаар бараа бүтээгдэхүүний татварыг хасахад л бизнес эрхлэгчид дор хаяж 140 сая евро хэмнэх гэнэ.
Гэрээг байгуулсны дараа Европын Комиссын ерөнхийлөгч Урсула фон дер Ляйен, “Энэ бол түүхэн мөч. Энэхүү гэрээ нь үнэхээр сайн боловсруулсан, орчин үеийн худалдааны гэрээ. Үүнийг байгуулснаар манай бизнесийн байгууллага, тариаланч, хэрэглэгчдэд маш их боломж нээгдэнэ. Гол нь дан ганц манайд бус хоёр талд хоёуланд нь ашигтай байх болно” хэмээжээ. Тийнхүү тус холбооноос Шинэ Зеландад оруулах хөрөнгө оруулалтын хэмжээ ч 80 гаруй хувиар нэмэгдэх гэнэ.
Чөлөөт худалдааны гэрээг Европын засгийн газар баталж, Шинэ Зеланд улс соёрхон баталснаар хүчин төгөлдөр хэрэгжих ажээ.
Эх сурвалж: Nikkei Asia