ОХУ-ын ерөнхийлөгч Владимир Путин өөрийнх нь цээж нүцгэн зургийг дооглож буй “Их 7” бүлгийн удирдагч нарыг цамцаа тайлчихвал дур гутам харагдах болно хэмээжээ.

ХБНГУ-ын Элмау Ордонд цуглан дээд хэмжээний уулзалт зохион байгуулсан “Их 7” бүлгийн удирдагч нар өнгөрөгч ням гарагт зохион байгуулсан уулзалтынхаа үеэр ноён Путины цээж нүцгэн, морь унаж буй зургийг дооглонгуй ярилцаж, хөөрөлдсөн бичлэг олон нийтэд хүрсэн юм. Бичлэгт бууснаар, Их Британийн ерөнхий сайд Борис Жонсон уулзалтын өрөөний бүгчим байгааг дурдаж, “Хүрмээ өмсөх үү? эсвэл тайлах уу? Бид хувцсаа тайлах хэрэгтэй юу?” хэмээн асуусан байна. Түүний асуултад Канадын ерөнхий сайд Жастин Трюдо зураг авах хугацаанд л хүрэмтэй байхыг зөвлөхөд ноён Жонсон,

-Бид Путинд өөрсдийгөө түүнээс хүчирхэг болохоо харуулах хэрэгтэй гэхэд ноён Трюдо,

-Бид цээж нүцгэн, морь унаж буй зургаа авхуулах болно. Жонсон,

-Бид тэдэнд булчингаа харуулах болно. Урсула фон дер Ляйэн,

-Морь унах ч сайхан шүү хэмээжээ.

Харин үйл явдлын хүрээнд пүрэв гарагт зохион байгуулсан хэвлэлийн бага хурлын үеэр ноён Путины сэтгэгдлийг асуухад тэр, “Би тэднийг бэлхүүснээс дээшээ эсхүл доошоо, яг хэрхэн тайчихыг хүссэн болохыг мэдэхгүй юм. Гэхдээ аль нь ч байсан гэсэн тэр дүр зураг дур гутам байх болно.

Хүн гэдэг өөрийн бие, сэтгэлийг жигд хөгжүүлсэн байх учиртай гэдэгтэй би хувьдаа бүрэн санал нийлнэ. Гэхдээ жигд хөгжүүлэхийн тулд та бүхэн согтууруулах ундааны хэрэглээгээ багасгаж, бусад муу зуршлаасаа салж, дасгал хөдөлгөөн хийх хэрэгтэй.

Би тэднийг бүгдийг нь хувь хүний үүднээс мэднэ. Бид тийм сайхан харилцаагүй байгааг ч би ойлгож байна. Гэсэн хэдий ч тэд бол удирдагч нар. Тэд хүсвэл зорьсон зорилгодоо хүрч чадна” гэсэн юм.

Эх сурвалж: BBC