Даваа гарагт ОХУ-ын ерөнхийлөгч Владимир Путин Беларусийн ерөнхийлөгч Александер Лукашенкотой уулзалт зохион байгуулсан билээ. Тэгвэл уулзалтын үеэр ноён Путин, Оросын эдийн засаг хүнд хэцүү нөхцөл байдлыг үл ажран олон улсаас тавьсан хоригийг тун сайн даван туулж байгаа хэмээн мэдэгджээ.

Түүний хэлснээр, “Үүсээд буй хүндрэлээс үл хамааран Оросын эдийн засаг хоригийн үр нөлөөг тун сайн даван туулж байгааг би энд цохон тэмдэглэмээр байна. Манай улсад хамаарах бүх л чухал макро эдийн засгийн үзүүлэлтүүд үүнийг батална.

Өдгөө өрнөж буй бүх зүйл манай эдийн засгийн салбарын онцгой анхаарал, хичээл зүтгэлийг шаардаж байгаа бөгөөд миний зүгээс тэдгээр хичээл зүтгэл биднийг эерэг үр дүнд хүргээсэй гэж хүсэж байна” гэжээ.

Тийнхүү уулзалтын хүрээнд тэр Орос-Беларусийн худалдаа өнгөрөгч жилд 38.5 тэрбум ам.долларт хүрч, дээд амжилт тогтоосныг дурдан саяхан ноён Лукашенкотой Москва хотноо уулзаж, дараа Сочи хотноо тусдаа уулзахаар товлосноо дурссан юм.

Ерөнхийлөгч Путиний өгүүлснээр, “Нөхцөл байдал биднээс маш нухацтай хэлэлцээр хийхийг шаардаж байгаа. Тодруулбал, бүс нутгийн аюулгүй байдал, бидний улс орнуудын эдийн засаг, аюулгүй байдлын хүрээнд бид хэлэлцээр хийх хэрэгтэй байгаа” хэмээжээ.

Эх сурвалж: ТАСС