Өнгөрөгч амралтын өдрүүдэд ХБНГУ-ын канцлер Олаф Шольц суудлаа авснаас хойш Африк тив рүү анхны айлчлалаа хийсэн билээ. Тэгвэл айлчлалын үеэр тэр Герман улс Сенегал улстай хамтран байгалийн хий, сэргээгдэх эрчим хүчний хүрээнд шинэ төсөл хөтөлбөрүүдийг эрчимтэй хөөцөлдөх хүсэлтэй байгааг уламжилжээ.
Сенегал улсын хувьд байгалийн хийн олон тэрбум шоо метрийн нөөцтэй бөгөөд Африк тивдээ байгалийн хийн гол үйлдвэрлэгч болж магадгүй байгаа юм.
ХБНГУ-ын хувьд ОХУ-ын байгалийн хийн импортоос үлэмж хамааралтай оршдог тул энэхүү хамаарлаа багасгахаар Сенегал улсын эрх баригчидтай ярилцаж, тус улсад байгалийн хий олборлох, шингэрүүлсэн хийн асуудлаар хэлэлцээр хийж эхэлсэн болохыг ноён Шольц мэдэгдсэн байна.
Түүнчлэн Герман улс тус улстай хамтран сэргээгдэх эрчим хүчний салбарт ажиллах хүсэлтэй байгаагаа уламжилсан юм. Гэвч энэ тухайд тэр тодорхой мэдээлэл өгөөгүй байна.
Хэвлэлийн бага хурлын үеэр Сенегал улсын ерөнхийлөгч ч өөрийн байр суурийг илэрхийлсэн нь, Сенегал улс Европын зах зээлд шингэрүүлсэн байгалийн хий нийлүүлэхэд бэлэн байгаа хэмээжээ.
Эх сурвалж: CNN