Баасан гарагт Ройтерс агентлагаас мэдээлснээр Австри улсын байгалийн хий, газрын тос, петрохимийн үндэстэн дамнасан компани болох OMV Оросын байгалийн хийн төлбөрөө төлж барагдуулахаар Газпромбанканд данс нээлгэжээ.
OMV компанийн хэвлэлийн төлөөлөгчийн Ройтерс агентлагт хэлснээр, “Бидний зүгээс хоригийн арга хэмжээг зөрчилгүйгээр байгалийн хийн төлбөрөө цаг хугацаанд нь төлж барагдуулах төлбөрийн нөхцөлийг хэрэгжүүлсэн.
Байгалийн хийн төлбөрөө еврогоор төлж барагдуулснаар бид өөрсдийн гэрээгээр хүлээсэн үүргээ биелүүлж байна гэж үзэх болно” хэмээжээ.
Гуравдугаар сарын 31-ний өдөр ОХУ-ын ерөнхийлөгч Владимир Путин байгалийн хий худалдан авч буй нөхөрсөг бус орнууд төлбөрөө рублиэр барагдуулах тухай тогтоолыг баталсан юм. Тийнхүү тогтоол хэрэгжиж эхлэхтэй зэрэгцэн улс орнууд Гакпромбанканд данс нээлгэж байгаа билээ. Харин данс нээлгээгүй орнууд руу байгалийн хий нийлүүлэхээ зогсоосон бөгөөд баасан гарагт л гэхэд Финланд улс руу нийлүүлэх байгалийн хийн нийлүүлэлт зогссон юм.
Эх сурвалж: ТАСС