Газпром Экспортоос баасан гарагт мэдээлснээр тэд өнөөдөр буюу тавдугаар сарын хорин-нэгний өдрөөс эхлэн Финланд улсын Гасум эрчим хүчний компанид байгалийн хий нийлүүлэхгүй гэжээ. Учир нь тэд өнгөрөгч дөрөвдүгээр сард худалдан авсан байгалийн хийн төлбөрөө төлж барагдуулаагүй байна.

Тэдний мэдэгдсэнээр, “Тавдугаар сарын хорин буюу энэ долоо хоногийн ажлын сүүлийн өдрийн байдлаар Газпром Экспортод Гасумын талаас ямар ч төлбөр хүлээн аваагүй учир бид 21-ний өдрөөс эхлэн тус улс руу байгалийн хий нийлүүлэхээ зогсоох боллоо. Тэд ОХУ-ын талаас тавьсан тогтоолын дагуу төлбөрийг барагдуулах хүртэл бид байгалийн хий нийлүүлэхгүй” гэжээ.

Харин Финланд улсын эрчим хүчний компани болох Гасумын зүгээс байгалийн хийг рублиэр худалдан авахгүй хэмээн мэдэгдсэн юм.

Газпромоос тийн мэдэгдэхээс өмнө Гасумын зүгээс өөр нэгэн мэдэгдэл гаргасан нь байгалийн хийн нийлүүлэлт 21-ний өдрөөс эхлэн зогсох тухай байжээ. Улмаар өнөөдрөөс эхлэн зуны цагт тэд байгалийн хийн хэрэгцээгээ Балтикконнектор хийн шугамаар дамжуулан хангах болсноо зарласан байна.

Эх сурвалж: ТАСС