АНУ-ын ерөнхийлөгч Жо Байдены Зүүн Азид хийх айлчлалын өмнө Хятадын ардын чөлөөлөх арми Номхон далай руу стратегийн бөмбөгдөгч онгоц хөөргөжээ. Одоогоор Хятадын "Ляонин" нисэх онгоц тээгч хөлөг Тайванийн зүүн хэсгийн усан хилд эсминецтэй хамт бэлтгэл хийж байна.

БНХАУ-ын Гадаад хэргийн яамны зүгээс ерөнхийлөгч Байдены Өмнөд Солонгос, Японд хийх айлчлалыг эрс эсэргүүцэж, Хятадыг хязгаарлах өдөөн хатгасан айлчлал гэж тодорхойлж байна. Хятадын стратегийн бөмбөгдөгч онгоц Номхон далайд сургуулилт хийж байгаа нь АНУ, Японтой илт дотносох болсон Тайванийн эсрэг хийж буй батлан хамгаалахын сургуулилт гэж тайлбарлаж байна.

Global Times cонины орон нутгийн цагаар 20-ны өдөр мэдээлснээр Хятадын арми Номхон далай болон Өмнөд Хятадын тэнгисийн ойролцоо "Ляонин" хөлөг онгоц болон хоёр "Н-6" стратегийн бөмбөгдөгч онгоцны хамтаар сургуулилт хийх зорилгоор байлдааны ажиллагаа явуулсан байна. Зүүн Хятадын тэнгисээс хөөрсөн хоёр стратегийн бөмбөгдөгч “H-6J” онгоц Окинава арал болон Миякогийн хоолойгоор дамжин Номхон далайд нэвтрэх нислэгийн бэлтгэл хийсэн гэж хэвлэлүүд мэдээлжээ.

Японы Батлан ​​хамгаалах яамнаас гаргасан гэрэл зурган мэдээллээс иш татан хэвлэл мэдээллийнхэн энэ удаа хөөргөсөн “H-6” бөмбөгдөгч онгоцонд "YJ-12" дуунаас хурдан пуужин суурилуулсан байсан гэж цохон тэмдэглэв. Уг пуужин нь 300-400 км-ийн зайд орших нисэх онгоц тээгч хөлөг онгоцны бүхэл бүтэн флотыг 2-4 шатлалын хурдтайгаар бут цохих чадвартай гэнэ. Ингэснээр энэхүү сургуулилт нь АНУ-ын нисэх онгоц тээгч хөлөг онгоцны флотод чиглэсэн болохыг төвөггүй ойлгож болохоор байгаа юм.

Хятадын цэргийн шинжээч Сүн Жунпин хэлэхдээ, "”H-6J” бөмбөгдөгч онгоц нь нисэхээр бэлтгэгдсэн газраасаа дайсны нисэх онгоц тээгч зэрэг байлдааны хөлөг онгоцыг онож чадна. Хэрэв олон тооны “H-6J” бөмбөгдөгч онгоцноос дуунаас хурдан “YJ-12” пуужинг олон тоогоор агаараас харвасан тохиолдолд дайсны флот Хятадын дайралтыг хамгаалж чадахгүй" хэмээн итгэлтэй хэлсэн байна.

Стратегийн хоёр бөмбөгдөгч онгоц энэ сарын эхнээс сургуулилт хийж байгаа “Ляонин” нисэх онгоц тээгч хөлгийн хамтаар сургуулилт хийж байгаа талаар гэж Global Times сонин онцлон хүргэжээ. “Ляонин" хөлөг онгоц 055 төрлийн найман сөнөөгч фрегат хөлгийн хамт Өмнөд Хятадын тэнгис болон Номхон далайд нисэх онгоц хөөрч, газардах сургуулилт хийж байна гэж хэвлэлүүд мөн дурдсан байна.

Global Times сонины дүгнэснээр Тайванийн асуудлаарх хамтын ажиллагаагаа бэхжүүлж буйгаа батлахаар дээд хэмжээний уулзалт хийж буй АНУ, Японы талуудаар тогтохгүй Тайванийн салан тусгаарлагчдад энэхүү сургуулилт нь хатуу анхааруулга болж байна хэмээв.

Хятадын Коммунист намын Улс төрийн товчооны гишүүн Ян Жечи 19-ний өдөр Цагаан ордны Үндэсний аюулгүй байдлын зөвлөх Жейк Салливантай утсаар ярихдаа, "Хэрвээ АНУ-ын зүгээс Хятадыг хязгаарлахын тулд Тайванийг ашигласан тохиолдолд Хятад улс өөрийн тусгаар тогтнол, аюулгүй байдал, язгуур эрх ашгаа хамгаалахын тулд шийдвэртэй арга хэмжээ авна” хэмээн онцолсон талаар хэвлэл мэдээллийн хэрэгслүүд хүргэжээ.

Мөн өдөр ГХЯ-ны сайд Ван И Японы ГХЯ-ны сайд Ёшимаса Хаяшитай утсаар ярихдаа "Япон улс түүхээс суралцаж, ирээдүйд ухаалаг хандах ёстой" гэж тэрээр анхааруулж хэлсэн байна.

Эх сурвалж: Asiae