Дэлхийн хүнсний томоохон компаниуд ээлж дараалан үйл ажиллагаагаа зогсоогоод буй ОХУ-д дэлхийн хэмжээний тэдгээр брэндүүдийг хуулбарласан ижил төстэй бүтээгдэхүүнүүд олширсоор байна.

Орон нутгийн хэвлэл мэдээллийн Москва таймс сонины орон нутгийн цагаар 16-ны өдөр мэдээлснээр, ОХУ-ын ундаа, ус үйлдвэрлэгч Очаково компани саяхан "Cool Cola", "Fancy", "Street" зэрэг нэртэй хийжүүлсэн ундаа үйлдвэрлэжээ. Эдгээр бүтээгдэхүүнүүд нь дэлхийн алдарт “Coca-Cola", "Fanta" болон "Sprite"-г дуурайлган хийсэн бүтээгдэхүүнүүд аж.

Тус компанийн танилцуулсан ижил төстэй эдгээр бүтээгдэхүүнүүд нь сав баглаа боодлын хэлбэр хийц төдийгүй өнгөний хувьд ч яг ижил өнгийг сонгосон байна. Мөн тус мэдээнд дурдаснаар "Cool Coke" нь колагийн, "Fancy" нь жүржийн, "Street" нь нимбэг болон лайм жимсний ургамлын охийн амтыг тус тус агуулсан гэв.

Coca-Cola болон Pepsi-Cola нар Оросын зах зээлд бойкот зарлахаа өнгөрөгч гуравдугаар сард зарласан. Украиныг эзлэн түрэмгийлсэн ОХУ-ын зах зээлд бизнесээ үргэлжлүүлсээр байгаа нь олон нийтийн шүүмжлэлд өртсөний дараа уг шийдвэрийг гаргасан билээ. Тэр үеэс хойш Оросын компаниуд Кока-Колагийн хоосон орон зайг дүүргэхийн тулд ижил төрлийн бүтээгдэхүүн үйлдвэрлэж эхэлсний нэг нь дөрөвдүгээр сард танилцуулагдсан “Grink Coke” бол энэ сарын эхээр “Comicola” гэх бүтээгдэхүүн мөн мэндэлжээ. Гэсэн хэдий ч хэрэглэгчдийн дунд "Амт нь нэг л сул байна” гэх шүүмжлэл гарсан талаар хэвлэл мэдээллийн хэрэгслээр мэдээлэв.

Өнгөрсөн гуравдугаар сарын эхээр АНУ-ын McDonald's түргэн хоолны сүлжээтэй төстэй лого бүхий “Ваня авга” гэх брэнд Орост барааны тэмдэг авах хүсэлтээ гаргаж байсан. Энэ нь McDonald's Орос дахь үйл ажиллагаагаа түр зогсоож байгаагаа зарласнаас гурав хоногийн дараа болсон юм. "Ваня авга"-ын лого нь баруун тийш л харсан болохоос яг л McDonald’s-ын шар өнгөтэй нуман “М" үсгэн логотой ижил байсан юм. McDonald's компани өнгөрөгч 17-ны өдөр тус улсын зах зээлийг бүрмөсөн орхиж, салбар дэлгүүрүүдээ дотоодын бизнес эрхлэгчдэд зарахаар шийдснээ мэдэгдсэн билээ.

Хоол хүнсний үйлдвэрлэл эрхлэгчдээс гадна ОХУ-ын засгийн газрын зүгээс барууны нийгмийн сүлжээний платформуудыг хааснаар "Instagram"-ыг орлох "Rosgram" болон "YouTube"-ийг орлох "RuTube" зэрэг платформуудыг хөгжүүлж нийтийн хүртээл болгожээ.

Эх сурвалж: Chosun