Шри Ланка улс сүүлийн 70 гаруй жилийн хугацаанд үзээгүй санхүүгийн хямралтай нүүр тулсны эцэст түүхэндээ анх удаа өрийн дефолт зарлажээ.

Тэдний хувьд 30 хоногийн дотор 78 сая ам.долларын өрийг барагдуулах ёстой байсан ч тус хугацаа лхагва гарагаар дуусгавар болсноор тийнхүү дефолт зарлахад хүрсэн байна.

Улмаар тус улсын Төв банкны ерөнхийлөгчийн мэдэгдсэнээр Шри Ланка улс өдгөө “урьдчилан сэргийлэх дефолт”-ын нөхцөлд байгаа гэнэ.

Тийнхүү пүрэв гарагийн үдээс хойш гэхэд дэлхийн томоохон кредит үнэлгээний хоёр ч газраас Шри Ланка улсыг дефолт зарласан болохыг баталжээ.

Өрийн дефолт гэдэг нь улс орны засгийн газрын зүгээс зарим эсвэл бүх өрөө дарж чадахгүй нөхцөл байдалд орж, түүнийгээ хүлээн зөвшөөрөхийг хэлдэг бөгөөд дефолт зарласнаар тухайн улсын нэр хүнд хөрөнгө оруулагч нарын хүрээнд унаж, олон улсын байгууллагаас зээл хүсэхэд хүндрэлтэй нөхцөл үүсдэг юм. Чингэснээр цаашид тус улсын мөнгөн тэмдэгт, эдийн засагт ч сөрөг нөлөө үзүүлнэ.

Шри Ланка улсын Төв банкны ерөнхийлөгч П Нандалал Вийрасингхэгийн хэлснээр, “Олон улсын байгууллагууд бидний өр төлөлтийн төлөвлөгөөг дахин гаргаж өгөхгүй болбоос бид өрөө төлж барагдуулж чадахгүй. Энэ нөхцөлийг л “урьдчилан сэргийлэх дефолт” гээд байгаа юм шүү дээ.

Албан ёсны нэршлээр бол дефолт гэж хэлэхэд буруудахгүй. Гэсэн ч бидний байр суурь маш тодорхой байгаа. Өр төлөлтийн төлөвлөгөөг дахин боловсруулахгүй болбоос бид өрөө төлж чадахгүй” гэжээ.

Тэдний зүгээс нийт өрийн 50 орчим сая ам.долларын төлөлтөд дахин төлөвлөлт хийлгэх хүсэлтэй байгаа юм.

Эх сурвалж: BBC