Пакистан улс даваа гарагт Дээд шүүхийн шүүгчээр ажиллах эрхмээ сонгож, түүхэндээ анх удаа эмэгтэй хүнийг шүүгчийн албан тушаалд томилжээ.
Шинэ шүүгч нь өдгөө 55 настай Аеша Малик гэдэг юм. Тийнхүү урьд урьдын дээд шүүгч нарын адилаар түүний тангараг өргөх ёслолыг зурагтаар шууд дамжуулсан байна.
Улмаар тус улсын ерөнхий сайд Имран Хан түүнд баяр хүргэж, өөрийн Твиттер хуудаснаа, “Дээд шүүхийн анхны эмэгтэй шүүгч болсон явдалд би шүүгч Аеша Маликт баяр хүргэж байна. Би түүний төлөө залбирч, түүнд сайн сайхныг хүсэж явах болно” хэмээжээ.
Аеша Малик өнгөрсөн онд ч мөн Дээд шүүхийн шүүгчийн албан тушаалд нэр дэвшсэн ч харамсалтайгаар сонгогдоогүй юм. Тэгвэл энэ жил тэрээр нэг саналын зөрүүтэйгээр ялалт байгуулжээ.
Эх сурвалж: CNN