Ажил олох, өөрт тохиромжтой ажлаа олох гэдэг ихээхэн ялгаатай. Хамгийн тохиромжтой ажлаа олохын тулд хүн өөрийн зорилго, хэрэгцээ, хүсэл мөрөөдөлд нийцэх ажил олно гэдэг тийм ч амархан зүйл биш. Гэхдээ ажил хайх явцдаа дээрх шалгууруудыг харгалзан үзэх нь танд тохиромжтой ажлаа олох боломжийг олгоно. Тэгвэл бид танд тохиромжтой ажлаа олоход хэрэгтэй хэдэн зөвлөгөөг хүргэе.

1. Ямар ажил хайж байгаагаа тодорхойлох

Ажил хайхаас урьдаар хувь хүн ямар ажил олох хүсэлтэй байгаагаа тодорхойлох нь чухал. Та өөр байгууллагад энэ л ажлаа хийхийг хүсэж байна уу? Эсхүл карьерын замналаа өөрчилж, шинэ зүйл туршмаар байна уу? Хэрэв хөдөлмөрийн зах зээлд анх удаа хөл тавьж байвал яах вэ? Эс бөгөөс ажил эрхлэлгүй удсан ч одоо л дахиад өөр зүйл хийж үзмээр санагдаж байна уу? гэх мэтээр өөрт тохирох асуултыг тавьж, оновчтой хариултаа олох хэрэгтэй. Ингэснээр та цаашид ямар ажил хийх хүсэлтэй байгаагаа тодорхойлоход хялбар болно.

2. Ажлын байр болоод тэдгээрийн танилцуулгатай танилцах

Ажил мэргэжил сонгоход хэзээ ч хуумгай хандаж болохгүй. Тиймээс ажлын байрны цахим хуудаснаас хүссэн ажлаа хайгаад, ямар нөхцөлд, юу хийдэг болохыг нь судалж, ямар ур чадвар шаардлагатай гэдгийг мэдэж авах нь маш чухал.

3. Цалингийн чиг хандлагыг нь судал

Хаана, ямар мэргэжлээр ажиллавал хэдий хэр хэмжээний цалин авах вэ гэдгийг судалж үзээрэй. Хэрэв ямар ажил хийхийг хүсэж байгаагаа тодорхойлсон бол тухайн ажлын хүрээнд судалгаа хий

Жишээлбэл, та редактораар ажиллахаар шийдэж гэж бодъё. Тэгвэл та редакторууд дотроо хэдэн төрөл байдгийг олж, ямар төрлөөр дагнасан редактор хаана ажиллаж, хэдий хэр хэмжээний цалин авдаг, ямар нөхцөлд ажилладаг болохыг тодруулах хэрэгтэй.

4. Илүү нарийвчилсан хайлт хийх

Та нэг компанид ажиллахыг хүсэж байна гэж төсөөлье. Тэгвэл таны сонирхсон ажлын байр тухайн компанид байгаа эсэхийг судалж үзэх хэрэгтэй. Хэрэв аз таарч тухайн компани ажилтан хайж байвал анкетаа илгээхээс бүү цааргалаарай.