Tесла компанийн гүйцэтгэх захирал Илон Маск 14-ний өдөр тус компанийн зарим бүтээгдэхүүнийг Dogecoin криптовалютаар худалдан авах боломжтой болсныг зарлалаа.
Маск мөн өдөр өөрийн Твиттер хуудсандаа "Теслагийн бүтээгдэхүүнийг Dogecoin-оор худалдаж авах боломжтой боллоо" хэмээн жиргэжээ. Өнгөрсөн оны арванхоёрдугаар сард тэрээр Теслагийн бүтээгдэхүүнийг худалдан авахдаа Dogecoin-оор төлбөрөө төлөх боломжийг бүрдүүлэх болно гэж мөн Твиттертээ жиргэж байсан билээ.
Ройтерс агентлагийн мэдээлснээр хүүхдүүдэд зориулсан цахилгаан унадаг дугуй “Cyberquad”, бэлэг дурсгалын зориулалтаар цөөн тоогоор бүтээсэн “Cybertruck”-ны хэлбэртэй “Cyber Whistle” шүгэл гээд зарим бүтээгдэхүүнийг Теслагийн онлайн дэлгүүрээс Dogecoin-оор төлбөрийг нь хийн худалдан авах боломжтой болжээ. Онлайн дэлгүүр дээр “Cyberquad”-ыг 1220 Dogecoin, “Cyber Whistle”-ийг 300 Dogecoin хэмээн үнэлжээ.
Криптовалюттай холбоотой мэдээ мэдээллийн CoinDesk сайтын мэдээлснээр Маск ийнхүү жиргэсний дараа Dogecoin-ийн үнэ ойролцоогоор 11 хувиар өссөн байна. 14-ний өдрийн Монголын цагаар 15:24 цагийн байдлаар Dogecoin-ийн үнэ 0.202465 доллар болсон нь 24 цагийн өмнөхөөс 18.24 хувиар өссөн үзүүлэлт болжээ.
Өнгөрсөн жил криптовалютын талаар хэлсэн түүний хэд хэдэн үгнээс болж ханш огцом хэлбэлзэж байсан удаатай. Тэрээр өөрийгөө “Dogecoin-ийн эцэг” хэмээн хэлж тус криптовалютын ханш тодорхой хувиар өсч байсан бол үүний дараа Америкийн нэгэн телевизийн нэвтрүүлэгт орохдоо “Dogecoin бол луйвар” хэмээн хошигносон нь ханшийг унагахад хүргэж байсан билээ.
Эх сурвалж: Asiae