Их Британи улсын засгийн газраас 2033 он гэхэд 2G, 3G сүлжээг хэрэглээнээс халахаа мэдэгджээ. Тийнхүү засгийн газраас Vodafone, EE, Vergin Media 2, O2, Three гэх гар утасны операторуудтай 2G, 3G сүлжээг унтраах хугацааг тохирсон байна.
Тэдгээрээс өнгөрөгч зургадугаар сард EE сүлжээний оператор компани BT 2023 он гэхэд 3G, дараагийн арван жилд нь 2G сүлжээг хэрэглээнээс хэрхэн халах төлөвлөгөөгөө танилцуулсан юм.
Улмаар Их Британи улсын засгийн газраас хэтийн ирээдүйд гар утасны операторуудын тоог нэмэгдүүлж, олигополи өрсөлдөөний орчинг бүрдүүлэхгүй гэдгээ амлажээ. Ингэснээр гар утас бүтээдэг компаниудад шинэ бүтээгдэхүүн гаргахад илүү хялбар болох гэнэ.
Тийнхүү 2G, 3G сүлжээг хэрэглээнээс халахад зөвхөн тухайн сүлжээг дэмждэг бүх төрлийн утас хэрэглээнээс халагдах юм. Тэдгээрийн тоонд дан ганц 3G сүлжээ дэмждэг ухаалаг утаснууд ч багтах ажээ. Харин 2028 он гэхэд тус улсын өнцөг булан бүрээс 5G сүлжээнд саадгүй нэвтрэх нөхцөл бүрдэх гэнэ.
Эх сурвалж: BBC