Бээжингийн анагаах ухааны баг хамт олон хөгжлийн бэрхшээлтэй хүмүүст зориулж хиймэл оюун ухаан бүхий гарыг зохион бүтээжээ. Тус гар нь хөгжлийн бэрхшээлтэй хүмүүсийг өөрсдөө бие даан товч товчлох, тайлах, аягаа өргөж барих зэрэг энгийн хэрнээ жижиг булчингийн ажиллагаа ихээр шаардсан үйлдлийг хийхэд туслах юм.

Бусад бионик гараас ялгаатай нь энэхүү хиймэл оюун ухаан бүхий гар нь арьсаар дамжуулан булчингийн мэдээллийг таньж, жижиг булчингуудыг удирдах гэнэ. Улмаар тухайн гарыг ашиглаж байгаа тохиолдолд хүн өөрийн эрхий хурууг хүртэл хөдөлгөж чадах ажээ. Бионик гарын хувьд эрхий хурууны хөдөлгөөн хязгаарлагдмал, ерөнхий атгах, суллах гэсэн үйлдэл л хийдэг тул товч товчлох, юмсыг зангидах зэрэг чимхлүүр үйлдэл хийж чаддаггүй юм.

Мөн бионик гарыг хэрэглэгч хүссэн үедээ зүүж, тайлж болдог бол энэ гарыг ашиглахын тулд хагалгаанд орох шаардлагатай гэнэ. Тийнхүү хэрэглэгчийн шууны булчинтай гарыг холбож, мэдээлэл дамжуулах боломжоор хангах ажээ.

Хятад улсын хувьд нийт 85 сая хөгжлийн бэрхшээлтэй хүн байдаг бөгөөд тэдний 25 сая хүн нь үе мөчтэй холбоотой хөгжлийн бэрхшээлтэй юм. Тухайн гарыг зохион бүтээсэн хүмүүсийн мэдээлж байгаагаар тэд өөрсдийн бүтээлээ цаашид ч улам хөгжүүлж, хөгжлийн бэрхшээлтэй ард иргэдийг жирийн хүмүүс шиг амьдрах боломжоор хангахад чиглэн ажиллана гэжээ.

Эх сурвалж: Xinhua