Канад улсад энэ сарын 11-ний өдөр хоёр эр ууланд авирч яваад хөл халтиран хүчтэй урсах хүрхрээ доорх хүйтэн усанд унажээ. Аз болоход тэднийг ууланд авирч явсан сикх залуус аварсан байна. Тэдний аврах ажиллагаа явуулж байгаа бичлэг цахим орчинд нийтлэгдсэн юм.
Бичлэгт бууснаар Кулжиндер Кинда өөрийн дөрвөн найзын хамтаар аврах ажиллагаа явуулж байгааг харуулсан байна. Улмаар хүний амь аварсан Кинда болон түүний найзуудаас NBC ньюс агентлаг яриа авсан бөгөөд ярилцлагад дурдсанаар хэдэн хүн тэдэн дээр ирээд амь нас нь эрсдэлд орсон хүмүүсийн тухай дуулгасан гэнэ.
Тийнхүү хүчтэй урсгал усанд унахгүй гэж амь тэмцэх эрчүүдийг аврахаар онцгой байдал дуудах гэсэн ч гар утасны сүлжээгүй байсан тул эргэн тойронд байх хүмүүс өөрсдөө л ямар нэг арга сэдэхээс өөр аргагүй болжээ. Арван минутын турш тэдний амийг аврах арга хайж, эргэн тойрноо нэгжсэн ч тус болоогүй учир тэрээр өөрсдийн тюрбан буюу толгойн алчуур, бас бус хувцсаа холбож, 10 метр гаруй уяа бэлтгэж, залуусын амийг аварсан байна.
Залуусын амийг аварсны дараахан түргэн тусламж хүрэлцэн ирсэн бөгөөд тэд Кинда болон түүний нөхдөд гүнээ талархал илэрхийлсэн юм.
Тус бүсийг хариуцсан түргэн тусламжийн алба хаагчийн мэдээлснээр ууланд авирч яваад хөл алдах нь тийм ч ховор үзэгдэл биш гэнэ. Учир нь тус бүсэд жилд хэд хэдэн удаа хүмүүс тийн золгүй байдлаар амиа алддаг ажээ. Гэвч уулчид тухайн бүсээр зорчсоор байгаа юм.
Дэлгэрэнгүй:
Эх сурвалж: NY Post