Bloomberg сувгийн орон нутгийн цагаар 12-ны өдөр мэдээлснээр, хагас дамжуулагч чипний хомсдолоос болж Apple компани энэ оны эцэс гэхэд iPhone 13-ийн үйлдвэрлэлийн зорилтот хэмжээгээ 10 сая нэгжээр бууруулахаар төлөвлөж байгаа гэжээ.
Apple компани энэ оны дөрөвдүгээр улиралд 90 сая ширхэг iPhone 13 загвар үйлдвэрлэхээр төлөвлөж байсан боловч Texas Instruments, Broadcom зэрэг хагас дамжуулагч үйлдвэрлэгч компаниудын үйл ажиллагаа тасалдсантай холбоотойгоор жилийн эцсийн үйлдвэрлэлийн төлөвлөгөөгөө бууруулсан бололтой. Тус 2 компани нь дэлгэц болон бусад эд ангиудыг Apple компанид нийлүүлдэг аж.
Хагас дамжуулагч чипний эрэлт нийлүүлэлтээс даваад байгаагаас үүдэн дэлхий даяар нүүрлээд буй энэхүү хагас дамжуулагч чипний хомсдол ирэх жил хүртэл бүр түүнээс ч урт хугацаагаар үргэлжилж магадгүй хэмээн таамаглаж байна.
Apple болон Broadcom компаниуд iPhone 13-ийн үйлдвэрлэлийн зорилтот хэмжээгээ бууруулж буй талаар тайлбар өгөхөөс татгалзжээ.
Эх сурвалж: Asian Economy